مرام

مرام

افغانستان سره له دې چې په تيرو څو لسيزو کې د جګړو او طبيعي پېښو له امله د پام وړ زيانونه ليدلي، ګڼ شمېر افغانانو خپل ژوند له لاسه ورکړ، چې په دغه برخه کې يوه ستره هستي د پوهو او مسلکي کادرونو وژل کېدل او يا له هېواد څخه د باندې تګ ته اړ کېدل دي. نو له همدي امله دې ته اړتيا لېدل کيږي، چې د مسلکي ، مجربو او پوهو کادرونو بيا روزنه تر سره شي تر څو د ټولنې د هر اړخيزې ښېرازۍ وړ وګرځي.  نو د لوړو زده کړو وزارت همدغې موخې ته د رسيدو له پاره د لوړو زده کړو او نيمه لوړو زده کړو موسسو د ايجاد، پراختيا او د هغو د څرنګوالي د پياوړتيا له پاره لاس په کار شو.

    په ۱۳۸۳ ل.ل کال کې د لوړو زده کړو وزارت په وړانديز د افغانستان د اسلامي جمهوري دولت په منظوري پکتيا پوهنتون د يوه تحصيلي مرکز په حيث د پکتيا ولايت په مرکز کې تاسيس او په کار يې پيل وکړ. دغه پوهنتون د لوړو زده کړو وزارت له لايحې او لارښوونو سره سم اداري، علمي او روزنيز تشکيل لري او د پوهنتون د رييس لخوا اداره کيږي.

پکتيا پوهنتون له ټول هېواد څخه د لوړو زده کړو د تر سره کولو له پاره ټول  هغه نارينه او ښځينه زده کوونکي مني او لري يې هم چې د کانکور د از موينې کمېټې له لوري پوهنتون ته ورپېژندل کېږي، بريالي زده کوونکي د پکتيا پوهنتون د ښوونې او روزنې، طب، حقوقو او سياسي علومو، انجنيري، ژبو او ادبياتو او اقتصاد په پوهنځيو کې د لېسانس په کچه روزي او تر فراغت وروسته يې د ټولنې خدمت ته وړاندې کوي.

   د کيفيت لوړتيا او تضمين د يوه تحصيلي مرکز تر ټولو ستر هدف دئ او له همدې امله د يوه معياري تحصيلي نصاب تطبيق، د تدريس له نوي مېتودولوژي څخه ګټه اخيستنه، د علمي کادرونو او اداري غړو مسلکي پرمختګ او د دغه مرکز په ټولو تحصيلي او اداري برخو کې د اسانتياوو رامنځته کول او د رښتينوالي،  شفافيت، همغږي او په چارو کې تنظيم او انسجام هغه څه دي چې پکتياپوهنتون د خپلو بنسټيزو موخو تحقق ته رسوي.

   پکتيا پوهنتون خپل رسالت پېژني او د علمي ارزښتونو د ساتنې او پراختيا په برخه کې زيار باسي او د اداري، اخلاقي فساد پر وړاندې مبارزه او د ملي وحدت د لاټينګښت له پاره نه ستړې کېدونکې هڅې خپله دنده بولي

موخې:

۱- د تحصيلي کېفيت لوړتيا او د علمي ارزښتونو ساتنه.

- د لوړو زده کړو وزارت له معيارونو سره سم د تعليمي نصاب او درسي کريکولم تطبيق.

- د زده کړې او تدريس د معاصرې مېتودولوژي دودول.

- د څېړنې، تاليف او ژباړې د چارو له پاره د سالم چاپريال رامنځ ته کول.

- د درسي او ممدو درسي توکو او معياري درسي چپټرونو چمتووالی.

- معلوماتي ټيکنالوژۍ او نټرنيټ ته لاس رسی.

۲- د بشري منابعو د ظرفيتونو لوړتيا.

- د کورنيو او بهرنيو بورسونو او سکالرشيپونو پرمټ د استادانو او علمي کادرونو د علمي او مسلکي ظرفيتونو پياوړتيا او پراختيا.

-د زده کړو او تجروبو د تر لاسه کولو په موخه د لنډ مهالو فيلوشيپ بورسونو څخه ګټه اخيستنه.

- د کليدي لارښوونکو ( مربيانو ) په مرسته او همکاري د اداري، تخنيکي او علمي کادرونو روزنه.

- په بهر او کور دننه د علمي سيمنارونو او کانفرانسونو رامنځته کول او په سمپوزيمونو کې ګډون.

- د علمي کادرونو او اداري کارکوونکو له پاره د روزنيزو ورکشاپونو او کورسونو رامنځ ته کول.

۳ـ د کتابتون پياوړتيا او د هغه له پاره د پرمخ تللو معاصرو وسايلو تر لاسه کول:

- د لابراتواري موادو په وسيله د لابراتوار تجهيز او بشپړتيا.

- په مېز، چوکۍ او درسي توکو سره د درسي خونو تجهيز.

- د پوهنځيو او اداري خونو له پاره د اړتيا وړ توکو ( موبل ، فرنيچر ) تر لاسه کول.

- د اړتيا او وړتياوو پر وړ لوازمو باندې د کتابتون سمبالښت.

۴- د فزيکي چاپيريال ( ودانۍ ) چمتووالی او د زيربينا د ظرفيت لوړتيا.

- له ستراتيژيک پلان سره سم د ودانيو جوړيدل.

- د لابراتوار د ودانۍ جوړول.

- دلوبو د ډګرونو او جمنازيوم چمتوالی.

- د جومات د ودانۍ جوړول.

۵-  د استادانو او اداري کار کوونکو له پاره د ښو خدمتونو وړاندې کول.

۶ – ريښتنوالي، شفافيت او صراحت.

- پر ټولو باندې د عدالت، شفافيت، ريښتنوالي، قانون او لايحو يو ډول تطبيق کول.

- د مکافاتو او مجازاتو موجوديت.

۷ـ تواميتونه:

د لوړو زده کړو له قانون سره سم په بهر او کور دننه د علمي، تحصيلي، موسسو او ادارو سره د علمي کلتوري او فرهنګي همکاريو تړونونه رامنځ ته کول.

۸- د مالي مرستو تر لاسه کول.

- د کور دننه د مالي سرچينو پيدا کول.

- د افغانستان د اسلامي جمهوري دولت څخه د عادي او پراختيايي بودېجې تر لاسه کول.

- له ولايتي، نړېوالو مرسته کونکو ادارو، ډونرانو، عادي وګړو او ملي تجارو څخه د مرستو تر لاسه کول.

۹-  د ټولنې په پراختيايي چارو کې ونډه اخيستنه.