پکتیا پوهنتون ۱۴۰۰ کال ،سلواغي ۳۰ مه
۱۴۰۰ کال، سلواغې ۳۰ مه، پکتیا پوهنتون
د پکتیا پوهنتون غونډو په تالار کې د امریکا له لوري د افغان ولس کنګل شوې شتمني په غبرګون کې مطبوعاتي کنفرانس چې مشري یې د پکتیا پوهنتون رئیس پوهنمل عبیدالله اخندزاده کوله تر سره شو.
په دغه مطبوعاتي کنفرانس کې چې د پکتیا پوهنتون مرستیالانو، اړوند پوهنځیو رئیسانو ، استادانو ، نظر خاوندانو او ژورنالیستانو برخه درلوده، ګډونوالو یې په یوه خوله له نړیوالو، خصوصاً له امریکا څخه د افغان ولس په حق کې د عدالت غوښتنه وکړه.
پوهنتون رئیس د امریکا له لوري د افغان ولس شتمني کنګل کیدل یو ظالمانه اقدام یاد کړ، په خبره یې دا د افغانانو شتمني ده هيڅ هیواد دې په یو او بل نامه ورڅخه نه اخلي.
پوهنتون رئیس وویل د یوه مسؤل او اګاه بنسټ په توګه د دوی دنده ده تر څو نړیوالو ته خپل دا پیغام چې عدالت تامین کړئ او د افغان غریب ولس شتمني ورڅخه په زور مه اخلئ ورسوي.
د کنفرانس نورو ګډونوالو هم په خپلو خبرو کې دغه شتمني د نظام نه بلکې د ولس مال یاد کړ، دوی په نړیوالو ادارو چې اشاره یې ملګرو ملتونو ته وه غږ وکړ تر څو امریکا له دا ډول خودسرانه پرېکړو را وګرځوي.
د ګډونوالو په خبره د نړیوالو اصولو او نورمونو له مخې افغانان کولای شي چې د امریکا ددې غیري عادلانه اقدام په مقابل کې معتبرو بنسټونو ته عریض شي.
کنفرانس د استاد محمد شریف امین لخوا د اختتامیه دعا په ویلو پای ته ورسېده.
د عامه اړیکو او نشراتو عمومي مدیریت
