پکتيا پوهنتون ته ښه راغلاست!

پکتیا پوهنتون په (۱۳۹۶) هـ .ش کال کې !

پکتیا پوهنتون په (۱۳۹۶) هـ. ش کال کې >

د پکتیا پوهنتون اداره د ټولو ورځنیو چارو لکه تدریسي، اداري او نورو برخو ترڅنګ، په تېر یوه کال کې د پوهنتون مشرتابه، ټولو درنو مامورینو، استادانو او خدماتي کارکوونکو پرمټ لاندې پرمختګونه لري، چې لنډه یادونه یې کوو:

 ۱ - د دوو دولتي پوهنتونونو(خوست شیخ زاید او ننګرهار پوهنتون )سره د هر اړخیزو همکاریو تړونونه لاسلیکول، چې عملاً، د ترفیعاتو، علمي سیمنارونو، کادري ازموینو، د کریکولم نوي کولو او معیاري کولو برخه کې کار روان او د مشورو پر مټ به یې زموږ پوهنتون لا غښتلی شي.

۲ – د شا او خوا (۴۸) ملیونه افغانیو په ارزښت د پکتیا پوهنتون لپاره د مالوماتي ټیکنالوژي مرکز یا ((IT سنټر او سولر سیستم قرارداد شوی، چې کارونه یې دا دی د پوهنتون داخل کې عملاً روان دي چې په مرسته به یې د پوهنتون ټول تدریسي، اداري او لیلیې تعمیرونه له انټرنیټ سره وصل شي او ټول محصلان، اداري کارکوونکي او استادان به ترې د پوهنتون په داخل کې په وړیا توګه ګټه اخلي، چې دا د ټولو مامورینو، استادانو او محصلانو لویه غوښتنه او ارمان و.

۳ – د شا او خو(۶۷،۴۸) ملیونه افغانیو چې شا او خوا (یو ملیون ) ډالره کېږي په ارزښت د حقوقو او سیاسي علومو پوهنځي لپاره د نوي تدریسي تعمیر جوړولو قرارداد شوی، منظور شوی او لنډ وخت کې به یې کارونه هم پیل شي.

۴ – د (9,9)ملیونه افغانیو په ارزښت په پکتیا کې د وروستیو چاودنو له امله د پوهنتون تخریب شویو برخو د ترمیم لپاره قرارداد شوی چې عملاً یې کار روان او کارونه یې د ولایت او وزارت مقامونو او پوهنتون ریاست د مشترک ټیم له خوا څارل کېږي او د هغوی په هدایت مخ پر وړاندې روان دي.

په دې قرارداد کې د مسجد او نجونو لیلیې لپاره فرشونه، پردې او شا او خوا (۱۲۸) المارۍ نوې اخیستل هم شامل دي.

۵ – د ولسونو او محصلانو په مرسته د( ۱۰۰۰) متر مربع پیاده رونو په اساسي او پاخه ډول جوړول.

۶ – د انکشافي بودجې څخه (۱۰۰۰) پایې د ټولګیو لپاره چوکۍ، (۲۰) پایې المارۍ، (۵) پایې دفتري میزونه او (۸) د خطابې میزونه اخیستل شوي او عملاً په پوهنتون کې ترې کار اخیستل کېږي.

۷ – دطب پوهنځي د تالارونو لپاره له انکشافي بودجې د (۳۱۲) عصري او میز لرونکو چوکیو اخیستل او نصب کول چې پوهنتون کې یې عملاً لیدلی شئ.

۸ – د تېرو کلونو په پرتله د حفظ او مراقبت په برخه کې د درې چنده زیاتې بودجې (۱،۲) ملیونه افغانیو له وزارت مقام څخه اخیستل او په ټولو برخو کې پرې د ترمیم چارې ترسره شوې دي.

۹ – د لیلیې لپاره له څو کلونو وروسته په لومړي ځل د نږدې (۱،۳) ملیونه افغانیو په ارزښت د اشپزخانې او طعام خوري سامانونه اخیستل شوي او تر پوهنتون پورې رارسول شوي دي.

۱۰ – په ټوله مانا د شفافیت لپاره د محصلانو ټوله بدل اعاشه د عزیزي بانک سره د پوهنتون څو کسیز پلاوي په شتون کې تړون لاسلیک شو، چې شا او خوا (۵۰۰۰) کسانو ته د بانک کارټونه جوړ شوي او ټول محصلان خپلې پیسې له عزیزي بانک څخه اخلي، چې د همدې تړون له مخې په پوهنتون کې د صرافي اتومات ماشین  (ATM) نصبولو عملي کار روان دی او ډېر ژر به فعال شي، چې یو د صرافي ماشین نږدې (۸۰) اتیا زره امریکايي ډالره قیمت لري.

د همدې قرارداد له مخې د پوهنتون ټولې لوحې نوې شوې او د لا زیاتو مرستو وعده یې ورکړې ده.

۱۱ – په پکتیا کې د (IRC) له ولایتي دفتر څخه د (۲۴) المارۍ، (۳۵) دفتري چوکیو او (۴۰) دفتري او چای خوړلو میزونه راوړل شوي چې عملاً ترې کار اخیستل کېږي.

۱۲ – د الکوزي شرکت څخه د پوهنتون استادانو، مامورینو، خدماتي کارکوونکو او د لیلیې نجونو محصلانو ته (۴۵۰) کمپلې درک شوې، توزیع شوې او عملاً ترې کار اخیستل کېږي.

۱۳ – د پوهنتون په تاریخ کې (۱۳۹۶) هـ . ش کال یوازنی کال دی چې پکتیا پوهنتون له ټولو قرضونو خلاص شو.

۱۴– د سرې میاشتې ریاست په مالي مرسته د پوهنتون مخې ته د تلو راتلو لپاره یو هوايي پول جوړولو چارې بشپړې شوې او ترې استفاده کېږي.

۱۵– د پکتیا پوهنتون په تاریخ کې د لومړي ځل لپاره کادري روغتون په ډېرو کمو خپلو امکاناتو او د عامې روغتیا ریاست په پوره مرسته فعال شو او د ټولو مریض لرونکو پر مخ په رسمي وختونو کې پرانیستی وي.

۱۶- د محصلانو عملي روزلو لپاره د طب پوهنځي په برخه کې د عامې روغتیا ریاست سره تړون لاسلیکول چې نږدې (۶۰) تنه محصلان ترې د ستاژ او په ټوله کې د طب پوهنځي ټول محصلان ترې د صنفي ستاژ لپاره ګټه پورته کوي.

۱۷– په پکتیا کې د کرنې ریاست سره د همکاریو تړون لاسلیک کول چې شا او خوا (۴۰۰) محصلان ترې استفاده کوي.

۱۸– د اقتصاد پوهنځي محصلانو لپاره د عزیزي بانک، مستوفیت، اقتصاد ریاست، ښاروالي، ګمرک او د تجارت او صنایعو خونو سره تړونونه لاسلیک کول چې شا او خوا (۲۰۰) محصلان به ترې هر کال ګټه پورته کوي او هلته به عملاً روزل کېږي.

۱۹– د حقوقو اوسیاسي علومو پوهنځي لپاره د بشري حقونو خپلواک کمیسون سره د همکاریو تړون لاسلیک شوی چې ترې په لسګونو محصلان د ټرنینګونو او نورو برخو کې ترې کار اخلي .

۲۰ – د ادبیاتو او ژورنالیزم لپاره د نن راډیو سره د همکاریو یو تړون لاسلیک شوی چې محصلان به په خپلو برخو کې عملاً روزي.

۲۱ – د ښځینه او نارینه محصلانو لپاره د پوهنتون په داخل کې یو مجهز کمپیوټر لیب جوړول چې په انټرنیټ سمبال دی او هره ورځ ترې په لسګونو محصلان استفاده کوي.

۲۲ – د الکټرونیکي کتابتون لپاره د شل پایو کمپیوټرونو نصبول او ترې انلاین استفاده کول.

۲۳ – د پوهنتون کتابتون لپاره  شا او خوا (۳۵۰۰) کتابونو راوړل شوي او ځای پر ځای شوي دي.

۲۴ – کتابتون په فزیکي او مانوي لحاظ پراخول چې پخوا پکې (۳۰) کسانو مطالعه کوله او اوس پکې له سلو زیات کسان په یو وخت کې مطالعه کولی شي،

۲۵ – د پوهځیو کتابتونونو د تقویې لپاره ځینې وسایل او کتابونه ورکړل شوي دي.

۲۶ – ټولو پوهنځیو ته یو یو عصري پرنټر او د انګلیسي او کمپیوټر ساینس درسونو د کیفیت لا ښه والي لپاره  د پوهنتون له بودجې څخه  دوه دیوالي سکرینونو اخیستل شوي دي.

۲۷ - د ټول پوهنتون تدریسي چارې ارزول شوې او د ارزونې بشپړ نتایج له سمونو او هدایاتو سره د پوهنځیو لا بهبود لپاره په اختیار کې ورکول شوي دي.

۲۸ – د پوهنتون ټولې اداري چارې ارزول شوې او پایلې یې د ټولو مامورینو سره شریکې شوې دي.

۲۹ - له پوهنتون څخه مو د زور واکانو او بې ځایه مداخله کوونکو د مداخلې ټول لاسونه د ولایتي ادارې او ولسمشر په قاطع حکم او همکاري قطع کړي دي.

۳۰ - دا چې په هیواد کې د وینو تویولو په ځای د وینې ورکولو دود رامنځ ته شي، د ټولو محصلینو ګروپونه، ادرس او د اړیکو شمېرې ثبت شوې او په ځينو یې کار روان دی، څو د اړتیا په وخت کې د خپلو ولسونو سره د علاقې له مخې مرسته وکړي، په دې کار سره به پوهنتونونه لا د ولسونو په زړه کې ځای پیدا کړي.

۳۱ - د ټولو پوهنځیو او څانګو د ارزونې په وخت کې د کریکولم او مفرداتو د نوي کولو سپارښتنه شوې، چې همدا اوس د ځینو څانګو کریکولمونه نوي شوي او په ځینو باندې عملاً د پوهنتون رییس تر مستقیم نظارت لاندې کار روان دی.

۳۲ - د پوهنتون رییس د مستقیم نظارت لاندې عملاً د استادانو له درسي پلانونو او درسونو څخه په ټولګیو کې مکرر نظارت شوی دی، چې تدریسي چارو کې ډېر پرمختګ راغلی دی.

۳۳ - د پوهنتون سرسبزي او چاپیریال ښکلا لپاره له (۱۴۰۰) څخه زیات نیالګي کېنول شوي او د ولسونو په مرسته له څلورسوه زیات زینتي ګلان او بوټي پوهنتون ته راوړل شوي، چې ساحه پرې ښکلې او درسي چاپیریال لا خوندور شوی دی.

۳۴ -  د پوهنتون په داخل کې په زرګونو ونو کې داسې ونې هم وې چې ورته په کال کې یو ځل اوبه نه رسېدې، چې اوس د پوهنتون هرې ونې ته د اوبو رسولو لپاره سیستم جوړ شوی او په اوونۍ کې هرې ونې ته تر دوو ځلو اوبه رسېږي، چې دا کار د پوهنتون په تاریخ کې لومړی دی او په وسیله یې نننی پوهنتون له پخواني سره ډېر فرق کوي او عملاً حس کېدلی شي .

۳۵ – د تېرې ځوانانو مدني ټولنې له خوا د راټولو شویو مرستو پر مټ د شا او خوا (۲) سوه زره افغانیو په ارزښت د پوهنتون لویې څاه لپاره د سولر سیستم نصب شو، څو په راتلونکي کې د پوهنتون نیالګیو لپاره د اوبو د کمبود ستونزه ونه لرو.

۳۶ – له انټرنیټ سره د پوهنځیو اداري خونې د پوهنتون له بودجې څخه په استفادې وصل شوې دي.

۳۷ – د پوهنتون ټولو زړو اسنادو لپاره  یو دایمي او نوي ارشیف جوړ شو، چې ټول اسناد به پکې خوندي وي.

۳۸ - د پوهنتون په کچه د محصلینو تشویقول چې په ملي مسایلو علمي سمینارونه ورکړي، چې اول سمینار یی د اقتصاد پوهنځي محصل عزت الله ارین په عمومي تالار کې ارایه کړی و او دا لړۍ د کال تر پایه ډېره ښه روانه وه.

۳۹ - د پوهنتون ادارې په بار بار هڅونې سره د پوهنتون مخ کې پیاده رونو اساسي جوړولو لپاره ښاروالي عملاً لاس په کار شوې او د پوهنتون اداره یې منندویه ده .

۴۰ -  په پوهنتون کې د مکافاتو او مجازاتو اصل د تطبیق او رواجولو لپاره د هغو پوهنځیو او څانګو په ستاینلیکونو نازول چې د ارزیابي په نتیجه کې یې ښه کارکرده ګي ثابته شوې وه.

۴۱ - ولایت مقام په شمول د پوهنتون تقاعد شویو استادانو ته ستاینغونډه برابرول، چې په دې سره هم دوی او هم نور استادان ښې کار کرده ګي ته تشویق شول .

۴۲ - د ښار جوړولو ریاست سره په همکاري په پوهنتون کې د بیا رغونو روانو پروژو کلک او مستقیم نظارت په صورت کې روانې پروژې له ډېرو سترو درغلیو ساتل شوې دي .

۴۳ -  د کابل او پولیتخنیک سابقه لرونکو پوهنتونونو سره لومړنۍ خبرې شوې او لنډ وخت کې به د علمي همکاریو او اړیکو قوي تړونونه رامنځته شي.

۴۴ – په هند کې له دوه معتبرو پوهنتونونو سره لومړنۍ خبرې شوې او په لنډ وخت کې به یې د تړون لاسلیک کولو چارې هم وشي.

۴۵ – د هیله تحصیلي شرکت سهیم ډاکټر تمیم اخلاص پکتیا پوهنتون ته سفر وکړ او د پوهنتون له رهبري سره یې د همدې شرکت له لارې د پوهنتون استادانو، مامورینو او محصلانو لپاره یې د روسیې په معتبرو پوهنتونونو کې د زیات تخفیف ژمنه وکړه .

۴۶ – د پکتیا پوهنتون د نجونو په لیلیه کې په ټوله مانا د لوړو زده کړو اصول سره سم ښځینه کارکوونکې استخدام شوې او تر ډېره اسانتیاوې ورته برابرې شوې دي.

۴۷ – د ولایت مقام په مرسته نجونو ته د بخاریو او لرګیو اماده کول د امتحاناتو په جریان کې .

۴۸ – د نجونو لیلیې د تدارکاتي او نورو ټولو چارو لپاره یو تیز رفتار موټر په واک کې ورکول شوی چې ډېری ستونزې یې حل شوې دي.

۴۹ – د پوهنتون په داخل کې ګل دانونه او چمنونه جوړ شوي چې هلته یې له نږدې کتلی شئ.

۵۰ – د پوهنتون ماسټر پلان جوړېدلو چارې ډېرې لنډې شوې او په لنډ وخت کې به یې ټول کارونه پای ته ورسېږي.

۵۱ – د فواید عامې، ښارولي او زراعت ریاستونو پر مټ د نیالګیو بیخونو ته (۷۰) موټره زراعتي خاوره راوړل شوې ده.

۵۲ – د ای ټي برخه کې د پوهنتون په پښو درولو لپاره دوه تنه مامورین د درې میاشتنیو زده کړو لپاره کابل پوهنتون ته لېږل شوي دي چې تر ډېره به مو راتلونکي کې ستونزې ورسره حل شي.

۵۳ – (۲۹) کسان سږ کال د ماسټري زده کړو لپاره بېلابېلو هیوادونو ته لېږل شوي دي، چې په پکتیا پوهنتون کې د یوه کال په جریان کې دا یو بې سارې شمېره ده، چې د پوهنتون اینده مو ورسره له حده دېره روښانه کېدلی شي.

۵۴ – لنډ مهالو کورسونو یا فیلوشیفونو ته د لومړي ځل لپاره له پکتیا پوهنتون څخه یو تعداد استادان معرفي شوي دي، چې ځینې یې تللي او راغلي او ځینې سفر ته تیاری کوي.

۵۵ – د شا او خوا (۶۰) تنه استادانو ترفیعات په خپل وخت اجرا شوي او له وزارت مقام څخه یې بې له کوم ځنډ او خنډ څخه منظوري اخیستل شوې ده.

۵۶ – د پوهنتون د لا پرمختګ په خاصر د مهمو تصامیمو لپاره د لس ګونو علمي شوراګانې، اداري شوراګانې او نورې اړینې غونډې نیول شوې دي، چې پایله یې ډېره ښه او په پوهنتون یې مثبت اغېز کړی دی.

۵۷ – د استادانو د علمي تحقیقاتي پروژو لس پروپوزلونه نړیوال بانک تمویل کړي او موږ یې منظوري اخیستې ده، شپږ نور تحقیقاتي پروپوزلونه د هند سفارت تمویل کړي دي.

۵۸ – په تېر کال کې د (۳۰) په شاو خوا کې کې د استادانو له خوا مهم علمي کنفرانسونه دایر شوي دي.

۵۹ – ملي ښاري کنفرانس ته د څلورو استادانو معرفي شوي چې له نیکه مرغه یوه استاد لومړی او دویم هغه یې د هیواد په کچه درېیم مقام ترلاسه کړی دی.

۶۰ – نړیوال بانک ته په سلګونه قلمه د لابراتواري توکو او په زرګونو جلده کتابونو لیست برابرول، چارې یې د وزارت له مقام سره په ګډه تر نړیوال بانک پورې تعقیب شوې دي او انشا الله چې په راتلونکي کال کې به یې د پوهنتون لپاره راته خریداري کړي.

۶۱ – د (۱۳۹۷)  کال لپاره عملیاتي، مسیر پیداکولو او تدابیري پلانونه ترتیب شوي دي، چې په تطبیق سره به یې د پوهنتون هر اړخیزه بڼه بدله شي.

۶۲ – د جمهوري ریاست د ځانګړي حکم په اساس د پکتیا پوهنتون د ماسټر پلان سره سم د پوهنتون لپاره د لسو راتلونکو کلونو پروژو پلانونه جوړ شوي او وزارت مقام او جمهوري ریاست ته لیږل شوي دي.

۶۳ – د پوهنتون ټولو تعمیرونو ساتلو او رغولو لپاره پلان ترتیب شوی او انشاالله چې راتلونکي کال کې به وزارت مقام د همدې پلان پر اساس ډېره بودجه راکړي .

۶۴ – د مشرانو جرګې د قدرمن مشر د مکتوب په اساس د پوهنتون احاطې او کادري شفاخانې لپاره د بودجې کمیسون ته امر شوی چې د (۱۳۹۷) کال په بودجه کې ورته مالی وجوه په نظر کې ونیول شي، چې دا چاره لا هم روانه ده او انشاالله چې ښه پایله به ولري.

۶۵ – د زیاتو هلو ځلو څخه وروسته په دې وتوانیدو چې د (۱۳۹۷) کال په بودجه کې د پکتیا پوهنتون د نوي کتابتون او تعمیر جوړولو لپاره د لوړو زده کړو وزارت له خوا بودجه منل شوې او هیله ده چې مالیې وزارت به هم بودجه را څخه ونه سپموي.

۶۶ – د پکتیا پوهنتون لپاره د طعام خوري، کمپیوټر ساینس او کودکستان تعمیرونو او احاطې لپاره د ډيزاینونو او پروپوزلونو چارې له ولایت مقام او لوړو زده کړو وزارت څخه خلاص شوي تر تحکیم ثبات پورې رسېدلي او لا هم د پوهنتون مشرتابه او مسوولینو له خوا تعقيبېږي.

۶۷ – پوهنتون ته یو کاسټر موټر اخیستل شوی چې د پوهنتون ځینې کوچنۍ ستونزې به ورسره حل شي.

۶۸ – ټولو پوهنځیو او څانګو ته د کریکولمونو د نوي کولو او راتلونکي کال لپاره د تدریسي برخه کې د تیاریو نیولو مسوولیت سپارل شوی او امید دی چې استادان به یې په ډېر ښه ډول سره ادا کړي.

۶۹ –  د پوهنتون استادانو ټولنې په مرسته د پوهنتون پراختیا او انکشاف لپاره نوې ځمکه غوښتل شوې چې وړاندیز یې د ښار جوړولو او لوړو زده کړو له وزارتونو خلاص شوی او د اصلاحات اراضي ریاست ته رسېدلی دی، د پوهنتون څو تنه پیاوړي استادان او د ټولنې مشر د پوهنتون ادارې سره په ګډه تعقیبوي چې که خدای کول دا به هم د پوهنتون لپاره لویه لاسته راوړنه وي.

۷۰ - د جموهوري ریاست محترم مقام ته د زر جریبه ځمکې، څلورو نویو پوهنځیو او د (۶۰۰۰) محصلانو په ظرفیت د لیليې تعمیرونو جوړولو وړاندیز رسېدلی ، چې د دوستانو پر مټ تعقیبېږي او ګورو چې څومره وخت کې یې خلاصولی شو.

په راتلونکي کال کې به مو ډېره برخه کار په کیفیت وي، چې د ډیپارټمنټونو له تقویې نیولې د نویو پوهنځیو تر ایجاد پورې به تر خپل ټول توان پورې مبارزه کوو.

هڅه به کوو چې د پوهنتون پاتې برخه هم سرسبزه شي او د دې پوهنتون درسي چاپیریال لا ښکلی شي.

د پوهنتون ځینې برخې چې تریم ته عاجله اړتیا لري، وړاندیز شوې او په ترمیم به یې کار کوو.

د پوهنتون ورځنۍ چارې سمبالول او هڅه کول چې د پوهنتون پراختیا او پرمختیا برخه کې لا ډېر پرمختګونه ولرو.

دا او دې ته ورته نورې لویې او وړې لاسته راوړنې شته چې پکتیاپوهنتون اداره یې په تېر یوه کال کې لري، چې واقعاً تېرو کلونو ته په کتو ډېرې دي، خو د پوهنتون اداره راتلونکي کال کې له دې د لازیاتو تابیا لري، خدای ج دې د همدې ادارې له مسوولینو سره مرسته وکړي.

په خورا درنښت

ستاسو ټولو خواخوږو او د پوهنتون مینه والو د مرستې او مینې په هیله