د ۱۴۴۴ کال، شوال ۱۱ مه، پکتیا پوهنتون

پکتیا پوهنتون کې د چاپېریال ســـاتنې په مـوخه یو ورځنی اشر ترسره شو.
په برابر شوي اشر کې چې ددې پوهنتون رئیس پوهنمل عبیدالله اخندزاده، اداري چارو مرستیال سیف الله محمدي د پوهنځیو استادانو، اداري او خداماتي کارمندانو او زده کړیالانو برخه درلوده، پکې د پوهنتون د انګړ او لښتیو صفا کاري چاره ترسره شوه.
د پوهنتون رئیس پوهنمل عبیدالله اخندزاده د چاپېریال پاک ساتل د ټولو ګډ مسؤلیت یاد کړ او په خبره یې هڅه باید وشي تر ممکنه حده خپل پوهنتون او د ژوند کولو چاپېریال باید پاک وساتو.
ښاغلي اخندزاده په دې برخه کې د اړوند ارګانونو څخه هم د لازمو همکاریو غوښتنه وکړه او د اشر له ګډونوالو څخه یې د زړه له تله مننه وکړه، چې تل یې له دوی سره په دې او دې ته ورته ټولنیزو فعالیتونو کې فعاله ونډه اخیستې.
همدارنګه د پوهنتون اداري چارو مرستیال سیف الله محمدي هم ګډونوال وهڅول چې لا هم د خپل چاپېریال ساتلو ته توجو وکړي، تر څو د ټولنې نور وګړي هم له دوی څخه په الهام اخیستلو خپل چاپېریال ته پوره پاملرنه وکړي.
بل خوا زده کــړیالانو هم د پوهنــــــتون پر دې اقدام خوښي څرګنده کړه، چې پر اساس به یې د پوهنتون چاپېریال پاک او دوی به پکې د بشپړې ارمتیا احساس وکړي.
د یادونې وړ دی، چې دا لومړی ځل نه بلکې څویم ځل دی، چې پکتیا پوهنتون د چاپیریال ساتنې په موخه ورته اقدام کوي، تر څو چاپېریال یې پاک او له ټولو هغو کثافاتو څخه خالي وي کوم چې د یوه سالم انسان بدن او روح ته زیان اړوي.

نشراتو او عامه پوهاوي عمومي مدیریت