پکتیا پوهنتون ۱۴۰۰ کال، دکب ۷
۱۴۰۰ کال، کب ۷ مه ، پکتیا پوهنتون
شنبه د پکتیا پوهنتون ناستو په تالار کې د پوهنتون پیل په مناسبت جوړه شوې غونډه کې چې د پوهنتون ریاست مقام لخوا ترتیب شوې وه، پکې د پکتیا والي شیخ محمد علي جان احمد، اقتصاد رئیس مولوي راشد، اطلاعاتو او کلتور رئیس مولوي خالقیار احمدزي، مستوفیت رئیس او یو شمېر نورو دولتي او غیري دولتي چارواکو برخه درلوده.
پروګرام د قرانکریم په څو مبارکو ایاتونو پیل شو، ورپسې د پکتیا پوهنتون رئیس پوهنمل عبیدالله اخندزاده د ناستې ګډونوالو ته د ښه راغلاست وینا وکړه.
پوهنتون رئیس علمي مرکزونه او تحصیلي ادارې د نظام ستنې یاد کړه، په خبره یې که کار ورته وشي، هغه ستونزي چې نن افغانستان او موجوده نظام ورسره لاس او ګریوان دی ژر به له منځه لاړې شي.
ورپسې د پکتیا والي شیخ محمدعلی جان احمد خبرې وکړې، نوموړي خوښي وښوده چې له کلونو ځنډ ورسته تحصیلي ادارې په داسي حال کې درسونه پيلوي چې په ټول هیواد کې بشپړ اسلامي نظام قایم دی.
پکتیا والي د علم پر ارزښت مفصل بحث وکړ او په خبره یې د دیني زده کړو سره په څنګ کې عصري زده کړې وخت او شرایطو ته په کتو مهم ضرورت دی.
هغه د پکتیا پوهنتون استادانو او اداري کارمندانو ته په خطاب کې وویل چې خپلو چارو ته متوجې شي، په پوره اخلاص او صداقت خپل کارونه مخته یوسي.
د پکتیا والي شیخ محمد علي جان احمد د وینا په ورستۍ برخه کې پوهنتون ته راغلو محصلینو ته ښه راغلاست وویلو او پکتیا پوهنتون سره یې د هر ډول مرستې او همکاري ډاډ ورکړ.
د پکتیا پوهنتون استادانو په نمایندګي د طب پوهنځي رئیس پوهنیار محمد شریف فرقاني ناستې ته خبرې وکړې.
هغه د مکتب، مدرسې او پوهنتون تر منځ د فاصلې پر ختمولو ټینګار درلود، هغه دا ټول د هیواد او ټولنې ضرورتونه یاد کړل.
ښاغلي فرقاني له ولایتي ادارې څخه وغوښتل چې له پوهنتون سره دې پوره همکاري وکړي، تر څو د پکتیا پوهنتون نیمګړې پروژې بشپړې شي.
هغه په نړیواله ټولنه هم غږ وکړ چې له نوي حکومت سره دي تعامل وکړي، په یوه او بله بهانه دي افغان ولس ته سزا نه ورکوي.
ناسته د اختتامیه دعا په ویلو سره پای ته ورسېده.
د نشراتو او عامه اړیکو لوی مدیریت
