پکتیا پوهنتون د ژبو او ادبیاتو پوهنځي له خوا د نیال کینولو او پاک کاري اشر ترسره شو!
پکتیا پوهنتون د ژبو او ادبیاتو پوهنځي له خوا د نیال کینولو او پاک کاري اشر ترسره شو!
د ژبو او ادبیاتو پوهنځي رییس پوهنیار بصیر احمد یاد د اشر ګډونوالو ته وویل چې، د پکتیا میړنيو او درنو ولسونو د پکتیا پوهنتون له تاسیسه تر دې دمه خپل کور ګڼلی او ګڼي یې. کال په کال یې د پوهنتون د زرغونتیا په برخه کې پراخه ونډه اخیستې. نوموړي زیاته کړه چې، د پوهنتون رهبري، د قدر وړ استادانو، اداري کارمندانو او ګرانو شاه زلمیو محصلینو هم پخپل مټ د رغونې ترڅنګ د پوهنتون ښکلا او سالم محیط رامنځته کولو په برخه کې په لویه کچه کار کړی. نن دوشنبه چې د ۱۳۹۹/۱۲/۲۵ مې نېټې سره سمون خوري د ژبو او ادبیاتو پوهنځي ریاست، محترمو استادانو او همدا رنګه ګرانو محصلینو یو اشر چې د افغان ولس یوه کلتوري او فرهنګي عنعنه ده ترسره کړ. دغه اشر درې برخې درلودې چې د پوهنځي دننه صفايي، د پوهنځي چاپیریال پاکول او د بوټو کرل پکې شامل وو. په یاد اشر کې د پکتیا پوهنتون محترم رییس پوهندوی دوکتور سیدولي جلالزي تر څنګ د محصلانو چارو مرستیال پوهنیار نقیب الله ځاځي هم ګډون درلوده. د پوهنتون رییس ښاغلي جلالزي د دې پوهنځي له رهبري، استادانو او محصلانو څخه مننه وکړه چې د پوهنتون په پرمختګ کې له موږ سره اوږه په اوږه کارکوي. همدارنګه ښاغلي یاد هم د پکتیا له محترمو ولسونو او په تیره بیا د ژبو او ادبیاتو پوهنځي له ټولو استادانو او محصلینو له ونډې اخیستلو مننه وکړه او په راتلونکې کې یې ورته د داسې نورو اشرونو توفیق له متعال رب ج څخه وغوښت.
په ځان بسیا افغانستان لیدو په هیله
اداره
