پکتیا پوهنتون کې د زون په سطحه د خصوصي پوهنتونونو او موسسو استادانو او کارمندانو ته د تضمین کیفیت او اعتبار ورکولو د پروسې اړوند درې ورځنی ورکشاپ دائر شو
د تضمین کیفیت او عتبار ورکولو دغه ورکشاپ چې پکې د لوړو زده کړو وزارت د تضمین کیفیت او اعتبار ورکولو رئیس استاد شاکرالله وحیدي، د پکتیا پوهنتون علمي چارو مرستیال پوهنمل عبدالله مسلم او د پکتیا دینې جامعې د مسؤلینو سربېره پکې د زون په سطحه د خصوصي پوهنتونونو مسؤلین او استادان برخه لري، پیل یې د شرعیاتو پوهنځي د استاد مولوي محمد صادق درویش له لوري د قران پاک په څو مبارکو ایاتونو سره وشو.
لومړی د پوهنتون علمي چارو مرستیال پوهنمل عبدالله مسلم د لوړو زده کړو وزارت د تضمین کیفیت او اعتبار ورکولو ریاست رئیس استاد شاکرالله وحیدي، د بېلا بېلو خصوصي پوهنتونونو مسؤلینو، استادانو او د تالار ګډونوالو ته ښه راغلاست او هرکلی وویلو او ورڅخه یې مننه وکړه، چې د تضمین کیفیت او اعتبار ورکولو په دغه ورکشاپ کې یې برخه اخیستې.
ورپسې د لوړو زده کړو وزارت د تضمین کیفیت او اعتبار ورکولو ریاست رئیس استاد شاکرالله وحیدي د درې ورځنی ورکشاپ پر ارزښت، اهمیت او ورته پر اړتیا مفصلې خبرې وکړې.
ښاغلي وحیدي تضمین کیفیت یوه نوې پروسه نه بلکې یو معمول یاد کړ، چې پر وینا یې له دې لارې پوهنتونونه او موسسې خپلې چارې ښې منظمې او ترتیب کولای شي.
وروسته د ورکشاپ په لومړۍ ورځ د پوهنمل محمد امین احمدزي او پوهنمل قدرت الله ځواک له لوري د تضمین کیفیت او اعتبار ورکولو پر لومړي، دوهم، درېیم او څلورم معیار ترتیب کړي، پريزینټېشنونه ارایه او د ګډونوالو پوښتنو ته یې ځوابونه ورکړل.
د یادونې وړ دی چې په دغه درې ورځني ورکشاپ کې به د تضمین کیفیت پر چوکاټ او جوړښت د پوهنتونونو او موسسو په کچه د اکاډميک اعتبار ساتلو پر معیارونو، د علمي پروګرانو پر ايجاد، بېلابېلو مديريتي مهارتونو او ورته نورو مهمو علمي او اداري موضوعاتو اړوند اړین موارد تشریح شي.
