د ۱۴۴۴ کال، شوال ۱۷مه، پکتیا پوهنتون
پکتیا پوهنتون کې د تضمین کیفیت کمېټې ناسته د پوهنتون د رئیس پوهنمل عبیدالله اخندزاده تر مشرۍ لاندې ترسره شوه.
ناسته کې چې د علــمي چارو مرستیال پوهنمل سیف الرحمن روهي، مالي او اداري چارو مرستیال سیف الله محمدي او د بېلا بېلو شعبو امرینو برخه درلوده، پیل یې له معمول سره سم د قران پاک په څو مبارکو ایاتونو سره وشو.
ورپسې د پوهنتون رئیس پوهنمل عبیدالله اخندزاده ګډونوالو ته د ښه راغلاست ویلو ترڅنګ تضمین کیفیت د پوهنتون اساس یاد کړ او په وینا یې څومره چې ممکن وې د پوهنتون اړوند ټولې شعبې او اداري واحدونه د تضمین کیفیت معیارونو ته پوره پاملرنه وکړي.
همدارنګه د پوهنتون رئیس د تضمین کیفیت دریم پړاو ته د پوهنتون کاندیدېدل او په بریالیتوب سره پاس کول د ټـــــــولو ګډ مسؤلیت یاد کړ او له استادانو څخه یې هم په دې برخه کې د بشپړې همکاري غوښتنه وکړه.
همدارنګه د علمي چارو مرستیال پوهنمل سیف الرحمن روهي د اړوند شعبو امرینو ته د کیفیت لوړولو او عتبار ورکولو په موخه لازمې سپارښتنې وکړې. هغه یو ځل بیا هم پوهنتون د ټولو ګډ کور یاد کړ او په خبره يې هر څوک باید د یو مسولیت او احساس له مخې خپلې دندې ترسره کړي.
وروسته له اجنډا سره سم پر یو شمېر موضوعاتو بحث ترسره شو او د ځینو مسائلو په اړه لازم تصمیمونه هم ونیول شول.
نشراتو او عامه اړیکو عمومي مدیریت
