د ۱۴۰۰ ه ش کال، کب ۱۹مه، پکتیا پوهنتون
د ۱۴۰۰ ه ش کال، کب ۱۹مه، پکتیا پوهنتون
پنجشنبه په پکتیا پوهنتون کې د نیالګیو کېنولو کمپاین چې فوق العاده استازي قاضي عبدالواحد همت، علمي مرستیال پوهنمل سیف الرحمن روهي، محصلانو چارو مرستیال پوهنیار نقیب الله ځاځي، مالي او اداري مرستیال سیف الله محمدي هم پکې برخه درلوده پیل شو.
د علمي مرستیال په خبره سږ کال به د ۳۰۰۰ نیالګیو په خوا وشا کې چې مثمر او غیري مثمر دواړه ډوله نیالګي به پکې شامل دي، د پکتیا پوهنتون په احاطه کې یې د کېنولو اراده لري.
نوموړي په پکتیا پوهنتون کې د سرسبزي کمېټې ته چې مشري یې د فارم عمومي مدیر محمد رسول غرنی کوي، سپارښتنه وکړه ، چې د نیالګیو کېنولو تر څنګ دې د هغوی حفاظت او پالنې ته هم پوره پام وشي.
د پکتیا پوهنتون مالي او اداري چارو مرستیال سیف الله محمدي هم د پوهنتون سرسبزي لپاره د نیالګیو کېنول مهم وبلل او په خبره یې له ټول کاري ټېم سره به د نیالګیو پالنه کوي، نوموړي له محصلینو هم وغوښتل چې د نیالګیو په ساتنه او حفاظت کې دې ورسره همکار شي.
د یادونې وړ ده چې پکتیا پوهنتون ټول ټال ۱۰۸ جریبه احاطه لري چې ډېره برخه یې لا له وړاندې په نیالګیو او ونو پوښل شوې ده.
د عامه اړیکو او نشراتو لوی مدیریت
