د ۱۴۴۶ کال، ربیع الاول ۲۹مه، پکتیا پوهنتون کې د اطلاعاتو او فرهنګ ریاست له لوري د نبوي سیرت د اخیستل شوې ازموینې پایلې د یوې غونډې په ترڅ کې اعلان شوې.
چهارشنبه د ربیع الاول میاشتې په ۲۹مه، پکتیا پوهنتون کې د اطلاعاتو او فرهنګ ریاست له لوري د نبوي سیرت د اخیستل شوې ازموینې پایلـــــــــــــــــــــــــــــې د یوې غونډې په ترڅ کې اعلان شوې.
په دغه مناسبت جوړې شوې ناسته کې چې د پکتیا پوهنتون، پکتيا اطلاعاتو او فرهنګ او یو شمېر نورو ادارو مسؤلینو برخه درلوده، پیل یې د قران پاک په څو مبارکو ایاتونو سره وشو.
مراسمو ته د پکتیا پوهنتون رئیس مولوي عبدالحکیم حمدي د خبرو پر مهال د پکتیا اطلاعاتو او فرهنګ ریاست له مسؤلینو څخه مننه وکړه، چې تل یې د ځوان قشر د روزلو لپاره هلې ځلې کړې او کوي یې.
ښاغلي حمدي همدارنګه د ازموینې ګډونوالو ته په خطاب سره ځوانان د ټولنې مهم قشر یاد کړ او ورڅخه یې غوښتنه وکـــــــــــــــــــــــــــــړه، چې د ټولنې او جامعې په جوړولو کې له دوی سره په ګډه رغنده ګامونه واخلي.
پوهنتون رئیس همدارنګه له دیني او نبوي ارشاداتو څخه خبرتیا او په ژوند کې د هغوئ پیاده کول ضروري یاد کړل، چې پر اساس یې د دنیا او اخیرت نېکمرغي په برخه شي.
همدارنګه د پکتیا اطلاعاتو او فرهنګ رئیس قاضي ثواب جان اسلام یار، د پکتیا دیني جامعې رئیس شیخ صاحب محمد اکبر فضلي او د پوهنتون د شرعیاتو پوهنځي رئیس مفتي محمد عمر فضلي هم هر اړخیزې ویناوې وکړې.
مراسم د نبوي سیرت اخیستل شوې ازموینې غوره ګډونوالو ته د ډالیو پر وېشلو او دعايې ویلو سره پای ته ورسېدل.
نشراتو او عامه پوهاوي عمومي مدیریت
